كتير قوى من المواقف الطريفة بنتعرض لها فى حياتنا زى مثلاً عند الدكتور او فى المستشفى ومن المواقف دى اللى حصل مع واحد صاحبنا بعد ما عمل العملية الجراحية دخل له الدكتور يهنيه ويقول له :
العملية نجحت وخيطنا الجرح وكله تمام هااااه ... قولى بقى انت ساعة ما دخلت تعمل العملية وبنديلك حقنة البنج وكنت بتسرخ جامد كنت عايز تقول إيه ؟؟
العيان قال له وهو بيموت من التعب : كنت عايز اقول لك ان مش انا العيان .. ده اخويا اللى قاعد بره
وطبعاً فيه كتير من الدكاترة بيبقوا اصحاب دم خفيف ولطيف زى صاحبنا اللى بيشتكى من تقل سمعه فراح للدكتور يقوله :
يا دكتور .. انا سمعى تقيل اوى لدرجة انى مبسمعش صوت الكحة بتاعتى فالدكتور طمنه وقال له : لالالالالالأ .. خد الدواء ده
فالعيان قال له : يعنى ده هيحسن صحتى ؟؟
الدكتور قال له : اومال ... ده هيعلى صوت الكحة عندك لدرجة إن الجيران هيسمعوا كحتك
واللى راح للدكتور وقعد يكشف عليه بإهتمام كبير اوى قعد يكتب له فى دواء ويأكد عليه : معلقة الصبح .. معلقتين بعد الغدا ولازم تطمنى كل ساعة وتتصل بيا لو حسيت بأى تحسن
فالعيان إستغرب بالإهتمام الزايد لكن وهو ماشى قال له : يعنى لازم يا دكتور اطمنك كل ساعة
قال له : اصل بصراحة الدواء ده جديد ومتجربش وانا عيان بنفس المرض اللى عندك ده
ومن المواقف الطريفة ان الدكتور وهو قاعد فى عيادته فجأة لقى شاب وسيم وشيك دخل عليه وبيشكره إن هو السبب اللى خلاه مليونير .. الدكتور استغرب وقال له : إزاى ؟؟
قام الشاب قال له : مهو بعد حضرتك ما عملت العملية لعمى انا ورثته
لكن كله كوم والحكاية اللى حصلت عند دكتور العيون كوم تانى خالص
بعد ما الدكتور طلع عيون المريض وحطها فى طبق علشان يعمل العملية الأرض إنشقت وطلعت قطة متعرفوش منين وراحت وكلة العيون بتاعت العيان اللى فى الطبق
الدنيا اتقلبت والدكتور قرر انه ياخد عيون القطة للمريض وبعد ما فاق من البنج دخل الدكتور يطمن عليه وقال له :
إنت عامل ايه دلوقتى
قال له : الحمد لله يا دكتور
الدكتور قال له : هاااااه طمنى شايف إيه ؟
قال له : لا انا الحمد لله شايف كويس يا دكتور ..... بس فيه حاجة غريبة ... الدنيا بقت مليانة فران
موضوع: ذكاء الاطباء الخارق 
2010-03-12, 01:40
