موش قلت لكم ,,,, انا إنسان موش كويس؟؟؟

صليت العشا..في الجامع..

معرفش صليت ريح مين..

مش عشان أنا منطوي..

لأ...بس حبيت أصلي بجد..

بصراحة مكنتش شايف في الجامع.. غير ربنا!!!

فكلمته..سبحانه...

قلتله.._سبحانه_ إنت جايبني هنا مع إني مستهلش..

إنت الكريم..وأنا اللئيم..ودار بينا حوار غريب...

المهم صليت...وبكيت بس في سري...

عارفين ليه؟؟

لأن الإمام كان بيقرا ...... "ألم يأن للذين آمنوا....."

ورجعت من الجامع وأنا سعيد...

أكيد النهارده مش عادي..

قررت استثمار الحدث...

عارفين إيه الحدث؟؟؟

قلبي...رق .... لان ... خشع...

فقررت أكلمه بالليل..

أكلم مين؟؟

أيوة طبعا هو اللي جه في دماغك......ربنا _سبحانه -

ونمت بدري ...

وفكرت وأنا نايم ....

ياترى أنا فين عند ه - سبحانه - ....يمين ؟؟ ولا...

وخفت .. ونمت ...والساعة تلاته لقتني صاحي...

واتوضيت....ووقفت قدامه..- سبحانه - مش عارف ..خايف ...

ولا مبسوط....

ولا مكسوف ......

ولاحيران......

ولا إيه....!!

وطلبت منه - سبحانه - اللي نفسي فيه...

عارفين اللي كان نفسي فيه إيه؟؟؟

طبعا صح ....الجنة..

وكمان غيرها حاجات تانية...

أصلي مش بتكسف أطلب منه - سبحانه -

عارفين...؟؟

بنتي الصغيرة مبتكلش ونفسها مسدودة وعندها أنيميا!!!

دعيته - سبحانه - يقتح نفسها..

والفلوس كانت مقصره معايا والولاد عاوزين مكرونه بالبشمل..وأنا حتى

ممعاييش تمن البشمل..

فدعيته - سبحانه - إن يرزقني بحق اللحمة والبشمل ...

صحيح أنا كنت مكسوف لأن ده مش معاد القبض لا المرتب ولا الحوافز ولا حاجة

خالص بس قلت لنفسي أكيد ربنا يقدر يبعتلي اللي نفسي فيه واللي نفس

الولاد فيه.....- سبحانه_

وبعدين ...استغفرته - سبحانه -

وصحيت أم العيال ...والعيال علشان يصلوا..

وصليت الفجر ..جماعة في الجامع..وقلت الأذكار

ورحت الشغل ...

وكان يوم جميل ..

وروحت بعد الشغل لقيت إيه؟؟؟

لقيت أم العيال عاملة المكروووونة وبالبشمل كمان...

استغربت طبعا..

لأ مش عشان فلوس المكرونة ..

لكن عشان أنا ..

ممكن ربنا يستجيب مني على طول كده؟؟؟؟

أم العيال بتنفض المرتبة لقت تحتها مبلغ كانت نسياه من زمان وكانت فكراه

اتصرف...-سبحانه -

سألت على البنت الصغيرة قالوا لي نامت..

قلت في نفسي أيوه كده ...مه طبعا أنا مستهلش إنه يستجيب لي الدعوتين..

.
قلتلهم صحوها تاكل ...لقيت أم العيال بتضحك وتقوللي خليها نايمة أحسن تاكلنا

..
غريبة...! هي أكلت؟؟

نص الصنية...ّ

سبحانك يارب..

اتغديت ..ونمت...

وبالليل ..مفروص علي إيييييه؟؟

للأسف...سهرت قدام الكمبيوتر لحد الفجر ونسيت أصلي له...

ونسيت أشكره!!!

مش قلتلكوا إني مش كويس؟؟

فاللهم اجبر كسرنا..

وتجاوز عن تقصيرنا..

ولاتجعل فتنتنا في ديننا..

وأعنا على ذكرك وشكرك وحسن عبادتك

بحبكم × الله

منقووووووووول